伯爵紅茶芝士蛋糕

話說, 我自細至結婚前都係新界人。住得新界梗係與昆蟲為伴啦, 而自小我已經係一個變態友, 經常製造昆蟲十大酷刑, 詳細就唔講, 因為真係幾嘔心, 總之我就係一個唔怕接觸昆蟲既人啦!

N年後已有家室的我, 往往在家發現任何昆蟲, 都係由我親自「打點」, 我老公次次都係逃之夭夭!有一次發現廁所有隻大飛曱甴, 呢條友先推我入廁所,自己再連人帶貓再衝入房閂埋門!在廁所的我當然不負所望成功打敗敵人啦!

點知尋晚我發現浴缸有隻曱甴, 佢躲在浴簾後只突出觸鬚, 以觸鬚長度估計係極大隻!講真, 我今次極唔願意去做呢個任務!!!其實我細個接觸的曱甴都係啡色瘦瘦那種, 大黑飛曱甴並唔係我喜歡既對手, 面對如手掌大的其他昆蟲我絕對歡迎被挑機, 但呢隻樣衰腳毛長太嘔心!於是我用邪靈一樣既眼神叫老公今次佢要負責攪惦佢, 響佢哭喪著臉時我已經連人帶貓衝左入房, 講明佢攪唔惦我係唔會出黎....哈哈..跟住聽到連續7下拍打聲, 戰況激烈, 老公終於完成人生第一次打死曱甴了,我梗係好誇張咁對佢致予最大讚賞啦! yeah!!ahaha..好無聊既夫婦!

講完嘔心既腳毛怪, 又講下食先..haha..呢排見好多人都整紅茶芝士蛋糕, 等我又試下先!改動左一個我整左n次既芝士蛋糕recipe, 好成功喎!我覺得比普通芝士蛋糕無咁"漏"添!呢個recipe係改左好多次最好味又甜度適中的。

材料 : 6吋模

1. 無鹽牛油 - 20g
2. 蛋- 2隻
3. 奶 - 65ml
4. 糖 - 40g
5. cream cheese - 100g
6. 低粉 - 15g
7. 粟粉 - 8g
8. 雲尼拿油 - 4滴
9. 荼包 - 2個

奶叮/煲至微溫加入茶包 

牛油,cream cheese,奶茶(不要棄茶包)先混合

座熱水打至滑身

拆開茶包倒入茶葉碎和雲尼拿油混合好

 

逐隻放入蛋黃打勻1隻再1隻再篩入粉類輕手拌勻

蛋白放冰箱雪8分鐘先拎出黎打

分3次加入糖打至中性

用cut & fold與蛋黃麵糊混合好倒入模, 盤倒入水, 見高ling話水中加入冰個面會唔裂,又試下先!

160度45分鐘, 真係無咩裂, 但唔算平滑

我唸我以後唔會食純芝士蛋糕, 加左伯爵紅茶真係太好味啦!!