芝士銀雪魚焗飯

大家成日都見我post一d素菜出黎, 可能都會以為我係一個素食者。但我呢個凡夫俗子其實係未戒晒肉的, 我絕對戒了的係牛肉,絕對戒唔到既係魚蛋..哈哈.. 所有牛豬雞肉檔我都唔會去, 但有時有d副產品當中含有肉成份可能會食。戒肉主要係唔想殺生, 唔關咩身體健康呀,環保呀, 宗教事, 我唔想迫自己, 但希望響不久既將來可以100%戒晒, 包括魚蛋..哈哈

其中去親餐廳會食既係焗豬扒飯, 諗深一層, 如果無左塊豬扒我仲係咪會中意食呢?答案係我會!因為芝士加蕃茄已經夠晒好味!於是我就試下同樣香脆既素銀雪魚取代塊扒, 又睇下好唔好食先!

先把素銀雪魚煎至鬆脆, 蛋炒飯,備用。

好耐以前, 整焗豬扒飯都會好隆重咁煲一煲超濃縮既羅宋湯用黎做汁, 但覺得唔好食, 點知有次響一間小店中發現最好味其實係最簡單, 就係只有蕃茄既汁!

汁做法 :

1. 先用細火爆香洋蔥粒, 大約爆15-20分鐘(係有d耐, 但信我, 係值得架!!)

2. 加入罐頭蕃茄蓉和小量茄膏(我用的都係100%蕃茄)

3. 加入水, 份量係茄蓉既一半

4. 煮至開始收汁就加入素雞粉,糖調味備用

開始砌圖時間 :

1. 先放入炒飯底

2.鋪上素銀雪魚

3. 倒入汁(老公中意食雜菜粒粒順手加埋, 後面沒有是我的, 因為我最憎食雜菜粒粒.hehe)

4. 加菠蘿(好似好奇怪, 但我覺得加芝士一齊焗係無比好味!)

5. 芝士!芝士!!你中意落幾多就幾多!!我勁落!!食野要咁先爽快!正正!!

ding : 嘩, 條友痴線, 唔知肥!

200度焗至金黃,食得!

好好味呀!(尖叫)

信我!就算無肉都好好味!